नाशिकरोड मध्यवर्ती कारागृहात तीन हजारवर बंदी आहेत. त्यात शिक्षा सुनावलेल्या (पक्क्या) आणि खटल्याची सुनावणी सुरु असलेल्या (कच्च्या) बंद्यांचा समावेश आहे. पक्क्या बंद्यांना रोजगार देण्यासाठीसाठी नऊ छोटे कारखाने कारागृहात आहेत. त्यात बेकरी, सुतारकाम, लोहारकाम, रसायन, मूर्तीकाम, चर्मद्योग, विणकाम आदींचा समावेश आहे. या व्यतीरिक्त कारागृहाची शंभर एकर शेती आहे. कारखाने व शेतीत बंद्यांना काम दिले जाते. या कामाबद्दल बंद्यांना कायद्यानुसार वेतन दिले जाते. या बंद्यांना दोन वेळचे भोजन, औषधोपचार, कॅन्टिन, व्यवसाय प्रशिक्षण, शिक्षणसह अनेक सोयी सुविधा दिल्या जातात. बंद्यांना रजाही मिळते. नातेवाईकांशी फोनवर बोलून ताण कमी करण्यासाठी लॅन्ड लाईन फोनची सुविधा आहे. बंद्यांना ठरावीक दिवसांनी कारागृहाच्या आवारात प्रत्यक्ष पाहून बोलता येते. गळाभेट सारख्या आगळ्या वेगळ्या उपक्रमात नातेवाईकांना बंद्यांची गळाभेटही घेता येते.
दिवाळीच्या काही दिवस आधी, दिवाळी दरम्यान आणि दिवाळीनंतरही बंद्यांना नवीन कपडे, चप्पल देण्यासाठी नातेवाईकांची मोठी गर्दी होते. कपड्यांशिवाय दिवाळी फराळ व अन्य वस्तू देता येत नाही. कारागृहाच्या प्रवेशव्दावरील कक्षात नातेवाईकांची नोंद करून भेटवस्तूंची तपासणी करण्यात येते. शिक्षा सुनावलेल्या पक्क्या कैद्यांना त्याचे नातेवाईक पंधरा दिवसातून एकदा तेही वीस मिनीटे भेटून बोलू शकतात. कारागृहाच्या भेट कक्षात सुरक्षा रक्षकांच्या निगराणीखाली ही भेट होते. नाशिकबरोबरच मुंबई, औरंगाबाद, नगर, धुळे, जळगाव आदी राज्यभरातील जिल्ह्यातील बंदी नाशिकरोड कारागृहात आहेत. त्यांना या जिल्ह्यातून नातेवाईक भेटण्यास येतात. साश्रु नयनांनी निरोप घेऊन परत माघारी फिरतात.