संतोष गिरी
लासलगाव| सणासुदीचा काळ आणि लागून आलेल्या सुट्यांमुळे आशिया खंडातील अग्रेसर लासलगाव बाजार समितीत कांदा लिलाव ५ तर धान्य लिलाव ७ दिवस बंद आहे. त्यामुळे कोट्यवधींची उलाढाल ठप्प होणार असून सणासुदीला दोन पैसे गाठीशी बांधता येतील या आशेवर असलेले शेतकरी मात्र चिंताग्रस्त झाले आहे. दि. १ एप्रिल पासून कांदा लिलाव पूर्ववत होणार आहे.
कोरोनाचा कांदा उत्पादकांना फटका
मार्च महिन्यातील अखेरचे दिवस असूनही लासलगाव बाजार समितीमध्ये लाल कांद्याची आवक अद्यापही मोठ्या प्रमाणात होत आहे. नवीन उन्हाळ कांद्याची आवक दाखल झाली आहे. कोरोनाचा प्रादुर्भाव वाढल्यामुळे कांद्याच्या बाजारभावात घसरण होत आहे. कांद्याचे बाजारभाव एक हजार रुपयांच्या आत आले असून सर्वसाधारण ८०० ते ९०० रुपये कांद्याला बाजार भाव मिळत आहे.
तोट्यात विक्री
कांदा उत्पादक शेतकरी आपला कांदा तोट्यात विक्री करत आहे. कोरोनाचं संकट त्यात पडलेले आहेत त्यामुळे शेतकऱ्यांसमोर दुष्काळात तेरावा महिना अशी परिस्थिती निर्माण झाली आहे. सात दिवस मार्च एंडिंग, सण आणि साप्ताहिक सुट्ट्या निमित्त बँकेतून पैसे मिळणार नसल्याने लासलगाव बाजार समितीसह नाशिक जिल्ह्यातील प्रमुख बाजार समित्यांमधील कांदा व धान्यचे लिलावाचे कामकाज बंद राहणार आहे. यामुळे लासलगाव बाजार समिती आवारात शुकशुकाट दिसत आहे. सलग ७ दिवस बाजार समिती बंद राहिल्यानं कोट्यवधींची उलाढाल ठप्प होणार असल्यानं कांदा उत्पादकांच्या अडचणीत वाढ होणार.
