नाशिक| जिल्हातील प्राथमिक आरोग्य केंद्रांसाठी नऊ रुग्णवाहिका महाराष्ट्र शासनाच्या आरोग्य विभागामार्फत नाशिक जिल्ह्यातील नव्याने मंजूर झालेल्या व रुग्णवाहिका नसलेल्या प्राथमिक आरोग्य केंद्रांसाठी पुरविण्यात आल्या आहेत.
नाशिक जिल्ह्यातील प्राथमिक आरोग्य लहवित, सय्यदपिंप्री, अंजनेरी, पळसन, करंजाळी, चिंचओहळ, दळवट व उंबरगव्हान या आरोग्य संस्थांना १०२ क्रमांकाच्या फोर्स कंपनीच्या बी टाइप रुग्णवाहिका प्राप्त झाल्या आहेत. नाशिक जिल्हा परिषदेसाठी प्राप्त रुग्ण वाहिकांचा लोकार्पण सोहळा कोरोना नियम पाळून प्रातिनिधिक स्वरूपात नाशिक जिल्हा परिषद आवारात नाशिक जिल्हा परिषदेचे अध्यक्ष नामदार श्री. बाळासाहेब क्षिरसागर व नाशिक जिल्हा परिषदेच्या मुख्य कार्यकारी अधिकारी लीना बनसोड यांचे शुभहस्ते वाहन चालकांचे हाती रुग्णवाहिकांच्या चाव्या व रुग्णवाहिकेचे नोंदणी प्रमाणपत्र देऊन करण्यात आला. याप्रसंगी जिल्हा परिषद सदस्य श्री.यशवंत ढिकले, माजी बांधकाम सभापती विलास बच्छाव, जिल्हा आरोग्य अधिकारी डॉ. कपिल आहेर व उपमुख्य कार्यकारी अधिकारी दीपक चाटे उपस्थित होते.
ग्रामीण भागातील गोरगरीब रुग्णांना प्राप्त रुग्ण वाहिकांद्वारे चांगली आरोग्य सेवा मिळेल व रुग्णांना जीवदान देणारी आपली सेवा राहील अशी अपेक्षा वाहन चालक यांना उद्देशून उपस्थित वाहन चालकांकडून अपेक्षा व्यक्त केली. नाशिक जिल्ह्यातील प्राथमिक आरोग्य केंद्रांसाठी अत्यावश्यक सेवा उपलब्ध होण्यासाठी रुग्णवाहिका मिळणेबाबत शासन स्तरावर प्रस्ताव पाठवून जिल्हा परिषदेनेपाठपुरावा केला होता.
सध्याच्या कोरोना साथरोग काळात महाराष्ट्र शासनाच्या आरोग्य विभागाने नाशिक जिल्ह्यातील प्राथमिक आरोग्य केंद्रांसाठी रुग्णवाहिका मंजूर करून दिल्याबद्दल नाशिक जिल्हा परिषदेचे अध्यक्ष नामदार बाळासाहेब क्षिरसागर यांनी राज्याचे मुख्यमंत्री नामदार श्री.उध्दव ठाकरे साहेब, उपमुख्यमंत्री अजितदादा पवार, आरोग्य मंत्री नामदार श्री. राजेश टोपे साहेब, नाशिक जिल्ह्याचे पालकमंत्री नामदार छगनरावजी भुजबळ साहेब, कृषिमंत्री नामदार दादाजी भुसे साहेब यांचे विशेष आभार व्यक्त केले आहे.