नाशिक| 'सच ऍपद्वारे' शारिरीक दृष्ट्या दुर्धर तथा इतर आजाराने बाधित असलेले आणि कोविड बाधीत रुग्ण तत्काळ शोधण्यास आणि उपचार करण्यास मदत होणार आहे. भविष्यात कोविड आजारावर मात करण्यासाठी सदर "सच ऍप" प्रणालीचा चांगला उपयोग होणार आहे असे मत जिल्हा परिषदेचे अध्यक्ष ना. बाळासाहेब क्षीरसागर यांनी व्यक्त केले.
कोरोना महामारीच्या पार्श्वभूमीवर सिन्नर तालुक्यातील आढावा सभेप्रसंगी ते बोलत होते. याप्रसंगी जिल्हा परिषदेचे अध्यक्ष ना. बाळासाहेब क्षिरसागर यांच्यासह जिल्हा परिषदेच्या मुख्य कार्यकारी अधिकारी श्रीमती लीना बनसोड, जिल्हा परिषद सदस्य श्री.निलेश केदार, श्रीमती सीमंतिनी कोकाटे,पंचायत समिती सभापती सौ.शोभाताई बरके, उपसभापती श्री.संग्राम कातकाडे, जिल्हा आरोग्य अधिकारी डॉ. कपिल आहेर, जिल्हा माता बाल व संगोपन अधिकारी डॉ. चौधरी, तालुका आरोग्य अधिकारी डॉ.मोहन बच्छाव, गटविकास अधिकारी डॉ.लता गायकवाड, ग्रामीण रुग्णालय सिन्नर येथील वैद्यकीय अधीक्षक डॉ. निर्मला गायकवाड, पंचायत समिती सदस्य श्री.जगन भाबड, सौ.संगीता पावसे, श्री.भगवान पथवे, सौ. सुमन बर्डे, अधिकारी व कर्मचारी उपस्थित होते.
कोरोना प्रादुर्भावा संदर्भात लोकप्रतिनिधी आणि प्रशासकीय अधिकारी यांच्यात कोविड समस्या व त्यावर करावयाची उपाययोजना यासंदर्भात चर्चा करण्यात आली. कोरोना हे देशावरील संकट असल्याने सर्व प्रशासकीय अधिकारी, कर्मचारी व लोकप्रतिनिधी यांनी समन्वयाने काम करणे आवश्यक असल्याची भूमिका जिल्हा परिषद अध्यक्ष ना. श्री. बाळासाहेब क्षिरसागर यांनी मांडली.
सिन्नर तालुक्यात कोरोना रुग्ण मोठ्या प्रमाणात आढळत असतांना पन्नास टक्के कमी कर्मचारी असतांनाही जिल्ह्याचे आरोग्य अधिकारी, तालुक्याचे आरोग्य अधिकारी कर्मचारी स्वतःला सांभाळून जनतेला चांगल्या प्रकारे आरोग्यसेवा देत असल्याबद्दल आरोग्य कर्मचाऱ्यांचे अभिनंदन व आभार जिल्हा परिषद सदस्य श्री. निलेश केदार यांनी मानले.
कोविड रुग्ण तात्काळ शोधणे व उपचार करणे यासाठी "सच प्रणाली" नामक ऑनलाईन ऍपचे उदघाटन नाशिक जिल्हा परिषदेचे अध्यक्ष ना. श्री. बाळासाहेब क्षिरसागर याचे हस्ते करण्यात आले."सदर ऍपद्वारे विविध आजाराने बाधित रुग्णास किंवा कोविड बाधित असलेल्या रुग्णाना धोका जास्त ओळखून लागलीच अशा रुग्णांना विशेष आरोग्य सेवा तात्काळ उपलब्ध करुन देण्यास मदत होणार आहे. सदरच्या "सच ऍप" प्रणाली सिन्नर तालुक्यात प्रायोगिक तत्वावर वापर सुरु करण्यात आली आहे. "सच ऍपचा" अनुभव लक्षात घेऊन संपूर्ण नाशिक जिल्ह्यात "सच ऍपचा" वापर जनतेच्या सेवेसाठी सुरू करण्यात येणार आहे.
सदर "सच ऍप" विकसित करण्यासाठी नाशिक जिल्ह्याची अग्रणी बँक- बँक ऑफ महाराष्ट्राने त्यांच्या सामाजिक बांधिलकी उपक्रमाअंतर्गत निधी उपलब्ध करुन दिला आहे. कोविड विरोधी मोहिमेत सामाजिक बांधिलकी म्हणुन बँक ऑफ महाराष्ट्र यांनी निधी उपलब्ध करुन दिल्याबद्दल बँक ऑफ महाराष्ट्राचे विशेष अभिनंदन नाशिक जिल्हा परिषदेच्या मुख्य कार्यकारी श्रीमती लीना बनसोड यांनी केले.